തിരുവനന്തപുരം: സംസ്ഥാനത്ത് കനത്ത മഴ തുടരുന്ന സാഹചര്യത്തിൽ എട്ട് ജില്ലകളിലെ വിദ്യാഭ്യാസ സ്ഥാപനങ്ങൾക്ക് അതത് ജില്ലാ കളക്ടർമാർ അവധി പ്രഖ്യാപിച്ചു. ഇടുക്കി, പത്തനംതിട്ട, വയനാട്, പാലക്കാട്, കോട്ടയം, മലപ്പുറം, ആലപ്പുഴ, കോഴിക്കോട് ജില്ലകളിലാണ് അവധി ബാധകമായത്.
അങ്കണവാടികൾ, ട്യൂഷൻ സെന്ററുകൾ, പ്രൊഫഷണൽ കോളേജുകൾ ഉൾപ്പെടെ എല്ലാ വിദ്യാഭ്യാസ സ്ഥാപനങ്ങൾക്കും അവധി ബാധകമാണെന്ന് അധികൃതർ അറിയിച്ചു.
ഇതിനിടെ, സഹകരണ വകുപ്പിന്റെ എച്ച്.ഡി.സി (Higher Diploma in Co-operation), ബി.എം (Bank Management) പരീക്ഷകൾ മഴ കണക്കിലെടുത്ത് മാറ്റിവെച്ചതായും റിപ്പോർട്ടുകളുണ്ട്. പുതുക്കിയ തീയതി പിന്നീട് അറിയിക്കുമെന്നാണ് വിവരം.
ഓണം പരീക്ഷകൾക്കും ബാധകം
സ്കൂളുകളിലെ ഓണം പരീക്ഷകൾ ഓഗസ്റ്റ് 13ന് ആരംഭിക്കാനിരിക്കെ, പരീക്ഷാ ദിവസങ്ങളിലൊന്നിൽ അവധി വന്നാൽ, ആ പരീക്ഷ പിന്നീട് ഓഗസ്റ്റ് 21ന് നടത്തുമെന്ന് വിദ്യാഭ്യാസ വകുപ്പ് നേരത്തെ വ്യക്തമാക്കിയിരുന്നു. ഓണം അവധിക്ക് ശേഷം ഓഗസ്റ്റ് 31ന് സ്കൂളുകൾ വീണ്ടും തുറക്കും.
വിവരങ്ങൾക്ക് കടപ്പാട്: ജില്ലാ ഭരണകൂടം, വിദ്യാഭ്യാസ വകുപ്പ് അറിയിപ്പുകൾ
