കോഴിക്കോട്: 14 വയസ്സുള്ള പെൺകുട്ടികൾക്ക് എച്ച്.പി.വി (HPV) വാക്സിനേഷൻ നൽകിക്കൊണ്ട് ഗർഭാശയഗള കാൻസറിനെതിരെ (Cervical Cancer) കരുതൽ തീർക്കുകയാണ് കോഴിക്കോട് ജില്ലാ ആരോഗ്യവകുപ്പും ദേശീയ ആരോഗ്യ ദൗത്യവും (NHM). ‘ഈ ഓണക്കാലത്ത് മകൾക്ക് നൽകാം ഏറ്റവും മികച്ച സമ്മാനം’ എന്ന സന്ദേശവുമായാണ് ക്യാമ്പയിൻ പുരോഗമിക്കുന്നത്.
സർക്കാർ ആരോഗ്യ കേന്ദ്രങ്ങൾ വഴി സൗജന്യമായാണ് 14 വയസ്സുള്ള പെൺകുട്ടികൾക്ക് ഈ വാക്സിൻ നൽകുന്നത്. ഓഗസ്റ്റ് 31 വരെയാണ് വാക്സിനേഷൻ ക്യാമ്പയിൻ തീയതി നിശ്ചയിച്ചിരിക്കുന്നത്.
#onam-beverage-bevco-sale-data-2026
📊 ക്യാമ്പയിന്റെ ജില്ലയിലെ നിലവിലെ പുരോഗതി:
- പ്ലാൻ ചെയ്ത സെഷനുകൾ: 3,355
- നടത്തിയ സെഷനുകൾ: 3,335
- വാക്സിൻ സ്വീകരിച്ച പെൺകുട്ടികൾ: 12,747
- മൊത്തം ലക്ഷ്യം: 26,342
- നിലവിലെ പുരോഗതി: 48.39%
എന്തുകൊണ്ട് എച്ച്.പി.വി വാക്സിൻ?
ഹ്യൂമൻ പാപ്പിലോമ വൈറസ് (HPV) മൂലം ഭാവിയിൽ ഉണ്ടായേക്കാവുന്ന ഗർഭാശയഗള കാൻസറുകളിൽ നിന്ന് പൂർണ്ണ സംരക്ഷണം ഉറപ്പാക്കാൻ ഈ വാക്സിനേഷൻ സഹായിക്കും. ചെറുപ്പത്തിൽ തന്നെ വാക്സിൻ നൽകുന്നത് വഴി പ്രതിരോധശേഷി വർധിപ്പിക്കാനും പെൺകുട്ടികൾക്ക് ആരോഗ്യകരമായ ഭാവി ഉറപ്പുവരുത്താനും സാധിക്കും.
ഓരോ വാക്സിനേഷനും പെൺകുട്ടികളുടെ ഭാവിയിലേക്കുള്ള സുപ്രധാന ചുവടുവെപ്പാണ്. അർഹരായ എല്ലാ പെൺകുട്ടികൾക്കും ഈ അവസരം പ്രയോജനപ്പെടുത്താം. കൂടുതൽ വിവരങ്ങൾക്കും വാക്സിനേഷനുമായി അടുത്തുള്ള സർക്കാർ പ്രാഥമിക ആരോഗ്യ കേന്ദ്രവുമായോ കുടുംബാരോഗ്യ കേന്ദ്രവുമായോ ബന്ധപ്പെടുക.
